Хотин-қизлар эътиборда!

Бугун мамлакатимизда хотин-қизлар турмуши фаровонлиги ва ҳаёт даражаси сифатини ошириш, аёл муаммоларига ечим топиб, дардига малҳам бўлиш масаласи давлатимиз сиёсатининг устувор йўналишларидан бирига айланди. Худди шу мақсадларда Ўзбекистон Республикаси Президенти топшириғига биноан Ўзбекистон касаба уюшмалари Федерацияси раиси Қудратилла Рафиков раҳбарлигида тузилган Хотин-қизларнинг муаммоларини ўрганиш ва ҳал этиш, уларни моддий ва маънавий қўллаб-қувватлашга қаратилган чора-тадбирларни амалга ошириш бўйича Республика ишчи гуруҳи фаолияти йўлга қўйилди.

Республика ишчи гуруҳи жорий йилнинг 24-29 март кунлари Андижон вилоятига ташрифи мобайнида вилоятнинг барча ҳудудларида уйма-уй юриб хотин-қизларнинг муаммолари ўрганилиб, мазкур муаммолар бартараф этиш мақсадида ҳар бир худуд бўйича манзилли чора-тадбирлар дастурлари ишлаб чиқилди ҳамда Ўзбекистон Республикаси Олий Мажлиси Сенати раиси, Ўзбекистон Касаба уюшмалари Федерацияси раиси ҳамда Андижон вилояти ҳокими томонидан тасдиқланиб ижрога йўналтирилди.

Тасдиқланган дастурлар ижросини таъминлаш мақсадида жорий йилнинг 9 июнь куни Марҳамат тумани Маданият марказининг катта мажлислар залида тадбир ташкил этилди. Тадбирда Андижон вилояти ҳокимининг ўринбосари, Маҳалла ва оилани қўллаб-қувватлаш бошқармаси бошлиғи М.Юнусова, Андижон вилояти касаба уюшмалари ташкилотлари Бирлашмаси раиси Ш.Балтабаев, Марҳамат тумани ҳокими Б.Юлдашевлар ҳамда мазкур ташкилот масъул ходимлари ва хотин-қизлар иштирок этдилар.

Шунингдек, тадбирда тумандаги хотин-қизларни муаммоларини бартараф этиш, уларни моддий ва маънавий қўллаб-қувватлаш ҳамда бандлигини таъминлаш мақсадида уларни эҳтиёжига кўра тикув машинаси, электро печи, кир ювиш машинаси, музлаткич, газ плитаси, компъютер жамланмаси, уй-жойларини таъмирлаш мақсадида қурилиш материаллари билан таъминлаш, соғлиқларини тиклаш мақсадида дори-дармон олиш учун сертифиқатлар ҳамда Касаба уюшмалари тасарруфидаги сихатгоҳларга йўлланмалар берилди.